ja an chemin ne an ostel 556
n'aiez longuement conpaignon
que vos ne demandiez son non;
le non sachiez a la parsome,
car par le non conuist an l'ome. 560
Biax filz, as prodomes parlez,
avoec les prodomes alez:
prodome ne forvoient mie
ces qui tienent lor conpaignie. 564
Sor tote rien vos vuel proier
que an yglise et an mostier
alez proier Nostre Seignor
qu'en cest siecle vos doint enor 568
et si vos i doint contenir [b]
qu'a bone fin puissiez venir.
-- Mere, fet il, que est iglise ?
-- Uns leus ou an fet le servise 572
celui qui ciel et terre fist
et homes et bestes i mist.
-- Et mostiers, qu'est ? --Ice meïsme:
une meison bele et saintisme, 576
plain de cors sainz et de tresors,
s'i sacrefie l'an le cors
Jesucrist, la prophete sainte,
cui Gïu firent honte mainte. 580
Traïz fu et jugiez a tort,
si sofri angoisse de mort
por les homes et por les fames,
qu'an anfer aloient les ames 584
qant eles partoient des cors,
et il les an gita puis fors.
Cil fu a l'estaiche lïez,
batuz et puis crocefïez, 588
et porta corone d'espines.
Por oïr messes et matines
et por cel seignor aorer
vos lo gié au mostier aler. 592
-- Donc irai ge mout volantiers
es iglises et es mostiers,
fet li vaslez, d'or en avant.
Ensi le vos met an covant. » 596
Atant n'i ot plus de demore,
congié prant, et la mere plore,
et sa sele li fu ja mise.
A la meniere et a la guise 600
de Galois fu aparelliez:
uns revelins avoit chauciez,
et par tot la ou il aloit
.III. javeloz porter soloit. 604
Ses javeloz an volt porter,
mes .II. l'an fist sa mere oster
por ce que trop sanblast Galois;
si eüst ele fet toz trois 608
mout volantiers, s'il poïst estre.
Une reorte an sa main destre
porta por son cheval ferir.
Plorant le beise au departir 612
la mere, qui mout chier l'avoit, [c]
et prie Deu que il l'avoit.
« Biax filz, fet ele, Dex vos doint
joie plus qu'il ne me remoint, 616
an quel que leu que vos ailliez. »
Qant li vaslez fu esloigniez
le giet d'une pierre menue,
si regarda et vit cheüe 620
sa mere au chief del pont arriere,
et jut pasmee an tel meniere
com s'ele fust cheüe morte;
et cil ceingle de la reorte 624
son chaceor par mi la crope,
et cil s'an va qui pas ne çope,
einz l'an porte grant aleüre
par mi la grant forest oscure; 628
et chevalcha des le matin
tant que li jorz vint a declin.
An la forest cele nuit jut
tant que li jorz clers aparut. 632
Au main, au chant des oiselez,
se lieve et monte li vaslez,
s'a au chevalchier antandu
tant que il vit un tref tandu 636
an une praerie bele
lez la doiz d'une fontenele.
Li trez fu biax a grant mervoille;
l'une partie fu vermoille 640
et l'autre fu d'orfrois bandee;
desus ot une aigle doree.
An l'aigle feroit li solauz,
qui mout luisoit clers et vermauz, 644
si reluisoient tuit li pré
de l'anluminement del tré.
Antor le tref, a la reonde,
qui estoit li plus biax del monde, 648
avoit .II. ramees fuilliees
et loiges galesches dreciees.
Li vaslez vers le tref ala,
et dist ainz que il venist la: 652
« Dex, ci voi ge vostre meison !
Or feroie je mesprison
se aorer ne vos aloie.
Voir dist ma mere tote voie, 656
qui me dist que mostiers estoit [a]
la plus bele chose qui soit,
et me dist que ja ne trovasse
mostier qu'aorer n'i tornasse 660
le Criator an cui je croi.
Je l'irai proier, par ma foi,
qu'il me doint ancui a mangier,
que j'an avroie grant mestier. » 664
Lors vient au tref, sel trueve overt,
en mi le tref un lit covert
d'une coste de paisle, et voit,
el lit tote sole gisoit 668
une dameisele andormie,
tote seule sanz conpaignie;
alees erent ses puceles
por coillir floretes noveles 672
que par le tref jonchier voloient
ensi com fere le soloient.
Qant li vaslez el tref antra,
ses chevax si fort s'açopa 676
que la dameisele l'oï,
si s'esveilla et tressailli;
et li vaslez, qui nices fu,
dist: a Pucele, je vos salu 680
si com ma mere le m'aprist.
Ma mere m'anseigna et dist
que les puceles saluasse
an quel que leu que les trovasse. » 684
La pucele de peor tranble
por le vaslet qui fol li sanble,
si se tient por fole provee
de ce qu'il l'a sole trovee. 688
« Vaslez, fet ele, tien ta voie.
Fui, que mes amis ne te voie.
-- Einz vos beiserai, par mon chief,
fet li vaslez, cui qu'il soit grief, 692
que ma mere le m'anseigna.
-- Je, voir, ne te beiseré ja,
fet la pucele, que je puisse.
Fui, que mes amis ne te truisse, 696
que, s'il te trueve, tu es morz.
Li vaslez avoit les braz forz,
si l'anbrace mout nicemant,
car il nel sot fere autremant, 700
mist la soz lui tote estandue, [b]
et cele s'est mout desfandue
et deganchi quan qu'ele pot,
mes desfansse mestier n'i ot, 704
que li vaslez an un randon
la beisa, volsist ele ou non,
.xx. foiz, si com li contes dit,
tant c'un anel an son doi vit, 708
a une esmeraude mout clere.
« Encor, fet il, me dist ma mere
qu'an vostre doi l'anel preïsse,
mes que plus rien ne vos feïsse. 712
Or ça l'anel, jel vuel avoir.
--Mon anel n'avras tu ja voir,
fet la pucele, bien le saiches,
s'a force del doi nel m'araiches. » 716
Li vaslez par la main la prant,
a force le doi li estant,
si a l'anel an son doi pris
et el suen doi meïsmes mis, 720
et dit: « Pucele, bien aiez !
Or m'an irai ge bien paiez,
et mout meillor beisier vos fet
que chanberiere que il et 724
an tote la meison ma mere,
que n'avez pas la boiche amere. »
Cele plore et dist au vaslet:
« N'an porter pas mon anelet, 728
que j'an seroie mal baillie
et tu an perdroies la vie,
que qu'il tardast, jel te promet. »
Li vaslez a son cuer ne met 732
rien nule de ce que il ot,
mes de ce que jeüné ot
moroit de fain a male fin.
Un bocel trueve plain de vin 736
et un henap d'argent selonc,
et voit sor un trossel de jonc
une toaille blanche et nueve.
Il la sozlieve, et desoz trueve 740
.III. bons pastez de chevrel fres.
Ne li enuia pas cist mes
por la fain qui forment l'angoisse.
Un des pastez devant lui froisse 744
et manjue par grant talant, [c)
et verse an la cope d'argent
del vin, qui n'estoit pas troblez,
s'an boit sovant et a granz trez, 748
et dit: « Pucele, cist pasté
ne seront hui par moi gasté.
Venez mangier, il sont mout buen.
Asez avra chascuns del suen, 752
si an remandra un antier. »
Et cele plore andemantier
que que cil la prie et semont,
que cele un mot ne li respont, 756
la dameisele, ainz plore fort,
mout durement ses poinz detort.
Et cil manja tant con lui plot
et but tant que asez en ot. 760
Lors prist congié tot maintenant,
si recovri le remenant,
et comanda a Deu celi
cui ses saluz point n'abeli. 764
« Dex vos saut, fet il, bele amie !
Por Deu, ne vos enuit il mie
de vostre anel que je an port,
qu'ainçois que je muire de mort 768
le vos guerredonerai gié.
Je m'an vois a vostre congié.
Et cele plore et dit que ja
a Deu ne le comandera, 772
car il li covandra por lui
tant avoir honte et tant enui
que tant n'an ot nule chestive,
Back to my Home Page
NextPage