se voloies a moi lancier				268
javeloz ne saiete traire,
ne me porroies nul mal faire.
-- Danz chevaliers, de tex haubers
gart Dex les biches et les cers,			272
que nul ocirre n'an porroie
ne ja mes aprés ne corroie.
Et li chevaliers li redist:
« Vaslez, se Damedex t'aïst,				276
se tu me sez dire noveles
des chevaliers et des puceles ?
Et cil qui petit fu senez
li dist: « Fustes vos ensi nez ?			280
-- Nenil, vaslez, ce ne puet estre
qu'ainsi poïst nule riens nestre.
-- Qui vos atorna donc ensi ?
-- Vaslez, je te dirai bien qui.			284
-- Dites le donc.--Mout volantiers.
N'a mie ancor .v. jors antiers
que tot cest hernois me dona
li rois Artus qui m'adoba.				288
es or me redi que devindrent
li chevalier qui par ci vindrent,
qui les .III. puceles conduient.
Vont il le pas ou il s'an fuient ? »			292
Et il dit: « Sire, or esgardez
cel plus haut bois que vos veez,
qui cele montaigne avirone.
La sont li destroit de Valdone.			296
-- Et qu'est de ce, fet il, biau frere ?
-- La sont li hercheor ma mere,
qui ses terres herchent et erent.
Et se ces genz i trespasserent,			300
s'il les virent, il le diront. »
Et il dient qu'il i iront
avoec lui, se il les i mainne,
jusqu'a ces qui herchent l'avainne.			304
 Li vaslez prant son chaceor			[b]
et vet la ou li hercheor
herchoient les terres arees
ou les aveinnes sont semees.			308
Et quant cil virent lor seignor,
si tranblerent tuit de peor.
Et savez por coi il le firent ?
Por les chevaliers que il virent,			312
qui avoec lui armé venoient,
que bien sorent, s'il li avoient
lor afere dit et lor estre,
que il voldroit chevaliers estre,			316
et sa mere an istroit del san,
que destorner le cuidoit an
que ja chevalier ne veïst
ne lor afere n'apreïst.				320
Et li vaslez dist as boviers:
« Veïstes vos .v. chevaliers
et .III. puceles ci passer ?
-- Il ne finerent hui d'aler				324
par ces forez », font li bovier.
Et li vallez au chevalier
qui tant avoit a lui parlé
dist: « Sire, par ci sont passé			328
li chevalier et les puceles.
Mes or me redites noveles
del roi qui les chevaliers fet,
et le leu ou il plus se tret.			332
-- Vaslez, fet il, dire te vuel
que li rois sejorne a Carduel,
et si n'a pas ancor quint jor
que li rois i ert a sejor,				336
que je i fui et si le vi.
Et se tu nel trueves iqui,
bien iert qui le t'anseignera:
ja si destornez ne sera				340
que tu la n'an oies anseignes.
Mes or te pri que tu m'anseignes
par quel non je t'apelerai.
-- Sire, fet il, jel vos dirai.			344
J'ai non Biax Filz.-- Biax Filz as ores ?
Je cuit bien que tu as ancores
un autre non.--Sire, par foi
j'ai non Biau Frere.-- Bien t an croi.		348
Mes se tu me vials dire voir,			[c]
ton droit non voldrai ge savoir.
-- Sire, fet il, bien vos puis dire
qu'a mon droit non ai non Biau Sire.		352
-- Si m'aïst Dex, ci a biau non.
As an tu plus ?-- Sire, je non,
ne onques certes plus n'an oi.
--Si m'aïst Dex, mervoilles oi,			356
les graignors que j'oïsse mes
ne ne cuit que j'oie ja mes. 
Tantost li chevaliers s'an part
les granz galoz, cui mout fu tart			360
qu'il eüst les autres atainz.
Et li vaslez ne s'est pas fainz
de retorner a son menoir,
ou sa mere dolant et noir				364
avoit le cuer por sa demore.
Grant joie an ot a icele ore
qu'ele le voit, ne pas ne pot
celer la joie qu'ele an ot,				368
car come mere qui mout ainme
cort contre lui et si le clainme
« Biax filz, biax filz » plus de .c. foiz.
-- Biax filz, mout a esté destroiz			372
mes cuers por vostre demoree.
De duel ai esté acoree,
si que par po morte ne sui.
Ou avez vos tant esté hui ?			376
-- Ou, dame ? Je le vos dirai
mout bien, que ja n'an mantirai,
que je ai mout grant joie eüe
d'une chose que j'ai veüe.				380
Mere, ne solïez vos dire
que li enge Deu nostre sire
sont si tres bel c'onques Nature
ne fist si bele criature,				384
n'el monde n'a si bele rien ?
-- Biax filz, ancor le di ge bien.
Jel dis por voir et di ancores.
--Teisiez, mere ! Ne vi ge ores			388
les plus beles choses qui sont,
qui par la Gaste Forest vont ?
Il sont plus bel, si com ge cuit,
que Dex ne que si enge tuit. »			392
 La mere antre ses braz le prant			[a]
et dit: « Biax filz, a Deu te rant,
que mout ai grant peor de toi.
Tu as veü, si com je croi,				396
les enges don la gent se plaignent,
qui ocient quan qu'il ataignent.
-- Voir non ai, mere, non ai, non !
Chevalier dient qu'il ont non. »			400
La mere se pasme a cest mot,
qant chevalier nomer li ot.
Et quant ele fu redreciee,
si dist com fame correciee: 			404
« Ha ! lasse, com sui mal baillie !
Biax dolz filz, de chevalerie
vos cuidoie si bien garder
que ja n'an oïssiez parler				408
ne que ja nul n'an veïssiez !
Chevaliers estre deüssiez,
biax filz, se Damedeu pleüst
que vostre pere vos eüst				412
gardé, et voz autres amis.
N'ot chevalier de si haut pris,
tant redoté ne tant cremu,
biax filz, com vostre peres fu			416
an totes les Isles de mer.
De ce vos poez bien vanter
que vos ne dechèez de rien
de son linage ne del mien,			420
que je fui de chevaliers nee,
des mellors de ceste contree.
Es Isles de mer n'ot linage
meillor del mien an mon aage;			424
mes li mellor sont decheü,
s'est bien an plusors leus seü
que les mescheances avienent
as prodomes qui se maintienent			428
a grant enor et an proesce.
Malvestiez, honte ne peresce
ne chiet pas, car ele ne puet,
mes les bons decheoir estuet.			432
Vostre peres, si nel savez,
fu par mi les janbes navrez
si que il mahaigna del cors.
Sa granz terre, ses granz tresors,			436
que il avoit come prodom,			[b]
ala tot a perdicion,
si cheï an grant povreté.
Apovri et deserité				440
et essillié furent a tort
li prodomë aprés la mort
Utherpandragon, qui rois fu
et peres le bon roi Artu.				444
Les terres furent essilliees
et les povres genz avilliees,
si s'an foï qui foïr pot.
Vostre peres cest manoir ot			448
ici an ceste forest gaste;
ne pot foïr, mes a grant haste
an litiere aporter se fist,
qu'aillors ne sot ou il foïst.			452
Et vos, qui petiz esteiez,
.II. mout biax freres aveiez.
Petiz esteiez, aleitanz,
po aveiez plus de .II. anz.				456
 Quant grant furent vostre dui frere,
au los et au consoil lor pere
alerent a .II. corz reax
por avoir armes et chevax.			460
Au roi d'Escavalon ala
li ainznez, et tant servi la
que chevaliers fu adobez.
Et li autres, qui puis fu nez,			464
fu au roi Ban de Gomeret.
An un jor andui li vaslet
adobé et chevalier furent,
et an un jor meïsmes murent			468
por revenir a lor repeire,
que joie me voloient feire
et lor pere, qui puis nes vit,
qu'as armes furent desconfit.			472
As armes furent mort andui,
don j'ai grant duel et grant enui.
De l'ainzné avindrent mervoilles,
que li corbel et les cornoilles			476
anbedeus les ialz li creverent.
Ensi la gent morz les troverent.
Del duel des filz morut li pere
et je ai vie mout amere				480
sofferte puis que il fu morz.			[c]
Vos esteiez toz li conforz
que je avoie, et toz li biens
que il n'i avoit plus des miens.			484
Rien plus ne m'avoit Dex lessiee
dont je fusse joianz et liee. »
 Li vaslez antant mout petit
a ce que sa mere li dit.				488
« A mangier, fet il, me donez.
Ne sai de coi m'areisonez,
mes mout iroie volantiers
au roi qui fet les chevaliers,			492
et g'i irai, cui qu'il an poist.
La mere, tant com il li loist,
le retient et si le sejorne,
si li aparoille et atorne				496
de chenevaz grosse chemise
et braies feites a la guise
de Gales, ou l'an fet ansanble
braies et chauces, ce me sanble;			500
et si ot cote et chaperon
de cuir de cerf clos anviron.
 Ensi la mere l'atorna.
Trois jorz, einz plus, n'i demora			504
que plus n'i ot mestier losange.
Lors ot la mere duel estrange,
sel beise et acole an plorant
et dit: « Or ai ge duel mout grant,			508
biax filz, quant aler vos an voi.
Vos irez a la cort le roi,
si li direz qu'armes vos doint.
De contredit n'i avra point,			512
qu'il les vos donra, bien le sai.
Mes quant il vandra a l'essai
d'armes porter, comant iert donques ?
Ce que vos ne feïstes onques			516
ne autrui nel veïstes faire,
comant an savroiz a chief traire ?
Malveisement, voire, ce dot.
Mal seroiz afeitiez del tot,			520
ne n'est mervoille, ce m'est vis,
s'an ne set ce qu'an n'a apris.
Mes mervoille est quant an n'aprant
ce que l'an voit et ot sovant.			524
  Biaus filz, un san vos vuel aprandre		[363 a]
ou il vos fet mout bon antandre;
et s'il vos plest a retenir,
granz biens vos an porra venir.			528
Chevaliers seroiz jusqu'a po,
filz, se Deu plest, et je le lo.
Se vos trovez ne pres ne loing
dame qui d'aïe ait besoing,			532
ne pucele desconselliee,
la vostre aie aparelliee
lor soit, s'eles vos an requierent,
que totes enors i afierent.				536
Qui as dames enor ne porte,
la soe enors doit estre morte.
Dames et puceles servez,
si seroiz par tot enorez;				540
et se vos aucune an proiez,
gardez que vos ne l'enuiez;
ne fetes rien qui li despleise.
De pucele a mout qui la beise;			544
s'ele le beisier vos consant,
le soreplus vos an desfant,
se lessier le volez por moi.
Et s'ele a enel an son doi,				548
ou a sa ceinture aumosniere,
se par amor ou par proiere
le vos done, bon m'iert et bel
que vos an portoiz son anel.			552
De l'anel prandre vos doin gié,
et de l'aumosniere, congié.
Biax filz, ancor vos vuel dire el:

Back to my Home Page

NextPage