Test

200	« Sauf te cuidoie et tu ez fauz,
	« Tu m'as donné venin pour basme. »
	Quant Jehans ot le vilain blasme,
	Il se saine, ne set que dire ;
204	Poi prisast en son escondire.
	Toute la cours sor lui resonne ;
	Li rois en jure sa couronne
	Qu'il ert de main menéz en l'ille
208	U li merz bat et li vens hille:
	« De ta desserte araz le droit. »
	Or vouz diray quelz l'ille estoit:
	Uns rochierz fu de mer encloz,
212	De boz estoit tous plainz le cloz.
	Trop avoit en la desertine
	Ourz et lions et sauvechine,
	Wivrez, dragons, serpens volans.
216	Quant ert repris aucuns dolanz
	Qu'on devoit a mort travillier,
	La ert menéz pour essillier
	Et lez bestez le devouroient
220	A grant dolour:  la l'essilloient.
	En tel afaire, en tel ahan
	Deut li roiz essillier Jehan
	Par le dit de la damoisele.
224	Li sains hom ceurt a sa capelle,
	Si a tout maintenant haherz
	Parchemin et taillé quoierz
	Et de son encre plain cornet,
228	Sez penez et son quenivet,
	Tout portera o lui le sire,
	Car aucun bien vaurra escripre
	En l'ille, desour le rivage ;
232	Ne redoute beste sauvage,
	Ne il n'a paour ne doubtanche
	Comment il ait sa soustenanche,
	Car en Nostre Signour se fie
236	Qui sez serjans paz ne deffie,
	Ains est touz jourz pres a deffendre.
	Li rois le commanda a prendre
	Pour destruire et pour devourer ;
240	Ne le vaurra plus demourer,
	Et cil i vont en ez lez paz,
	Si l'amainent pluz que le paz,
	Celui qui n'ert mie meffaiz.
244	La fille alu roy fu el palaiz
	Si li dist, quant le vit venir:
	« Ichou vouz doit bien advenir,
	« Danz faus prestre, malvaiz leciere. »
248	Li sains hom a levé la ciere,
	Quant a entendu la parole,
	Si a resgardee la fole:
	« K'est ce, male femme, c'az dit ?
252	« Certez, laidement az mesdit.
	« Diuz set moult bien que je n'ay coupez
	« En cel pechié dont tu m'encoupez.
	« Moult comperaz cier ton desroy,		[Fol. 179ro]
256	« Car je depri au souvrain roy
	« Qu'il te renge ta fausse plainte.
	« Si que del fruit dont ez enchainte
	« A nul jour delivre ne soiez,
260	« De si adont que me revoiez. »
	Li serjant l'en mainent atant,
	De toutez pars le vont batant,
	N'arrestent dusquez a la rive ;
264	De laidengier cascuns estrive.
	Aprestee trouva le nef ;
	Doucement i entre et soëf
	Li capelains, dont li oel larment,
268	Et li serjant, qui moult bien s'arment
	Pour lez lions et pour lez ourz,
	Le mer passerent a droit courz
	Dusqu'en l'ille qu'il vont requerre ;
272	Le saint homme mirent a terre,
	Puis si se sont ariere espaint,
	Et li capelains, qui remaint,
	S'est a la terre agenoulliéz,
276	[De larmez a les eux moulliéz.]
	Une sainte orison commenche:
	« E ! vrais Dieux, cui au dïemenche
	« De tez manoeuvrez reposaz,
280	« En paradis Adan posaz
	« Dont puis fu mis horz com mendiz
	« Pour le fruit que li deffendiz,
	« Laz ! pour quoy aerz il la pome
284	« Que conpré ont trestout li home
	« Que nature a forméz et faiz ?
	« Il meïsmez en ot tel faiz
	« K'en travail fu tant com fu viz
288	« Et puis fu en infer ravis,
	« En tenebrez, en oscurté
	« Pour le fruit de maleürté ;
	« Honte en ot li ame et li corpz.
292	« E ! vraiz perez misericors,
	« Duel eüs de ta creature
	« Ki estoit en la vil closure,
	« U tout aloient, fol et sage.
296	« En terre envoiaz un message,
	« A celui fu dis li salus
	« Qui est voie, vie et saluz.
	« Cele parole charz devint,
300	« Au Noël a naiscement vint ;
	« Li angele az pasteurz le nonchierent,
	« Qui forment s'en esleechierent.
	« L'estoile fu dez roiz veüe,
304	« Cascuns connut en sa venue ;
	« L'estoile a vous lez amena.
	« Diverse offrande vous donna
	« Cascuns, selonc ce qui lour samble,
308	« Et vous lez presistez ensamble.
	« Cascuns vint seuz de son empire
	« Et vouz lez assamblastez, Sire.
	« Au saint temple fustez offerz ;
312	« Li justez Simeon, vos serz,
	« Vous rechupt de joie aempliz:
	« Lors fust sez desirs acomplis,
	« Et la parole qu'il sçavoit
316	« Que Sains Espris dit li avoit:
	« Ains que la morz paor te fache,
	« Verras tu don Diu en la fache.
	« Il le vit voir, a son talent.
320	« Si com jou croi tout vraiement
	« K'ensi avint touz ciz recorz,
	« Si sauvéz vouz m'ame et mon corpz
	« Et envoiéz sustanche et vie.
324	« Diablez m'a fait par envie
	« Chest duel, qui'st de mal enseigniéz. »
	Il lievre suz, si s'est signiéz.
	L'orisonz fu en latin dite:
328	Por ce l'ay en romanz escripte
	Que li lay le puisent entendre,
	Fermer en leur cuerz et aprendre ;
	Ki le dira de boin corage,
332	Mius en ert a tout son eage.
	Li sains hom qui'st a tort menéz,
	Ert de tous biens enluminéz ;
	Envers le ciel resgarde haut,
336	Hardïement entra el gaut ;
	Ainc lez bestez ne resoigna.
	Or oiéz que Diuz li dona:
	Quant il vint en la desertine,
340	Li dragon et la serpentine,
	Li lion et lez aultrez bestez,
	Dont il i ot moult de rubestez,
	Encontre le saint home aloient,
344	Si l'aorent et enclinoient				[Fol. 179vo]
	Humlement com fuscent oëlles.
	Lez vertuz Diu et les merveillez
	Ne porroit bouce d'ome dire.
348	Tant ala par le bos li sire
	K'il vit un arbre en un destor,
	Dont li herbe estoit drue entor,
	De rains, de foelle est bien vestuz ;
352	La est li preudom arrestus
	Et si li plot a remanoir,
	La vaura faire sen manoir.
	Dez rains et de la foelle aporte,
356	Closure i fait, entree et porte.
	Quant che ot fait li Diu amis,
	Signa soy, si s'est dedens mis:
	La vaurra aucun bien escripre.
360	Mais il ne scet de coy puist vivre
	Ne de quel part secourz li viegne ;
	A Diu, se lui plaist, en souviengne
	Par sa grasse, par sa pité.
364	La nuit, quant il fu anuité
	Li sains hom ne s'oublia pas:
	A genous va en ez lez paz,
	Dist complie devenz la cele
368	Del jour de la Viege pucele ;
	Et apréz vigile des morz.
	Le boin us u il ert amorz
	Vaurra, se il peut, maintenir,
372	La droite voie veut tenir.
	Se bien a ouvré dusk'a ore,
	S'il peut mieus, le fera encore.
	Dedens la nouvele maison
376	Fu toute nuit a orison ;
	S'il dormi, ce fu a genous,
	Piecha qu'il n'ot esté saous.
	Matinez dist a l'ajournee,
380	Quant clere fu la matinee,
	A Diu moult saintement rendi
	Et prime et tierche et midi ;
	En son cueur fait veu et promesse,
384	S'armez eüst, il cantast messe.
	Epitle et Evangile dist.
	Apréz un dez quaierz eslit,
	Si apreta son escritoire,
388	Commenchier veut un saint estoire
	El non del poisant roy celestre ;
	Il ne vaurra mis huiseus estre:
	Ki en huiseuse s'amolie,
392	Penser li fait mainte folie.
	Son parkemin, sa pene taille,
	Puis entre en la haute bataille
	Dont diablez a grant envie.
396	Il commenche une sainte vie,
	U ot mainte bele aventure ;
	Forment li plaisoit l'escripture,
	Son fain oublie pour sa joie.
Back to previous page