2010	Or oiés comment Deus l'oneure.
	A chou qu'il va le maistre rue,
	Eis un desvé qui jete et rue;
	Nus hom nel pooit detenir.
	Quant li sains hom le voit venir,
2015	Lieve sa main, si le segna.
	Diables tant le resongna
	Que maintenant issi du cors
	Ausi bruians com fust uns tors.
	La gent forment s'en espeüre,
2020	Mais li sains hom les asseüre.
	Conduit l'ont a le mere glise,
	Ou il fist puis maint bel servise.
	Puis en fu vesques grant tempoire,
	Si com vous oés en l'estoire.
2025	Li vesques et l'autre clergie,
	Li rois et sa chevalerie,
	Ont tant prié qu'il est remés.
	Mout en fu lie la chités.
	Il ont droit, que par son segnacle
2030	I fist Deus puis maint bel miracle.
	Il n'estoit hom, ne lais ne clers,
	Qui de malage fust enfers,
	S'il atouchoit lui ou ses dras,
	Ne fust garis en es le pas.
2035	Mout l'avoient en grant memoire.
	Il fist faire son escritoire;
	Volentiers travelloit ses mains.
	La escrisoit vies de sains.
	Et cil qui clers iert mervellous
2040	Disoit estoires glorious,
	C'ainc n'orent ois ne veus.
	Por ce ot non Jehans Paulus,
	Que nus clers ne le contrevaut;
	Puis Saint Pol ne dist nus si haut
2045	De la sainte devinité.
	Si fu deus ans en la chité.
	Ses biens ne doit on ja taisir.
	Au tierç an fist Deus son plaisir,
	Car li vesques ala a fin.
2050	Jehan, qui mout ot le cuer fin,
	Eslirrent tout a estre el siege,
	Et si proierent le clergié
	Otroiés fu del haut capitre,
	Tant qu'il prist le croche et le mitre.
2055	Ensi plot Dieu Nostre Segnor,
	Qui l'apela a tel honour.
	Bien savoit comment il vivoit
	Et maint pecheour delivroit,
	Qui de la mort estoit souspris.
2060	Par lui fu li chemins apris,
	En paradis le droite voie,
	Que couvoitise et maus desvoie.
	Prions a cel bon euré
	Qu'il por nous proit a Damredé
2065	Que tout soions en paradis.
	Ce nous otroit Deus Jhesu Cris. Amen.
 
	Chi define li vie Saint Jehan Paulus.
 
 
 
 

Back to previous page

Back to Hagiography