Test

1015	Ichi mains seus en cest boscage
	Si com une beste sauvage.
	Lai ester! Reva t'ent arriere!
	Je ferai tant par ma proiere
	C'apostoiles seras de Rome.
1020	De toi ferai si tres haut home
	Que tous li mons t'essaucera
	Et ton quemandement fera.
	Se feme voloies avoir,
	Jou te donrai si grant avoir,
1025	Tu aras le fille d'un conte."
	Trestous les delis li aconte
	Dont on puet home esleechier;
	Pres va qu'il ne le fait pechier.
	Quant li sains fu en teus effrois,
1030	Desour son chief a fait le crois,
	Et sour son cors et sour sa chiere.
	Li Sathanas s'en fuit arriere,
	Car de la crois a tel doutanche
	Qu'envers lui n'a nule poissanche.
1035	Dont estoit bien trois jors ou quatre
	Que il ne s'i osoit enbatre.
	Quant il plus le veoit palir,
	Li fel le raloit assalir,
	Si li ramembroit son lignage,
1040	Ses rentes et son iretage:
	"Reva t'en! Laisse ta folie!
	Mout ieres en grant segnorie.
	Tu aras les vairs, les hermins,
	Les dous mangiers et les bons vins.
1045	Assés porras aumosnes faire;
	Se tu veus, si vestiras haire.
	On fait bien en mainte maniere.
	Dont es tu ore si pecherre ?
	Onques ne fesis avultere.
1050	Se tu fuisses traïtre lerre,
	Si fais tu trop grant penitanche.
	Tu mains ichi a grant vieutanche.
	Va t'en! Laisse les espinois."
	Jehans refist sor lui la crois.
1055	Quant le signe ot sor lui remis,
	En sus se traist li anemis,
	Qu'il ne pooit en nule guise
	Lui retorner par couvoitise,
	Car fois et loiauté le maine.
1060	Quant il vit qu'il perdoit sa paine,
	D'un autre engieng se porpensa.
	Droit a Toulouse s'en ala,
	S'a pouralee la chité.
	Adont i avoit roiauté;
1065	Uns mout preudons rois i estoit,
	Qui une bele fille avoit,
	Gente de cors et de visage;
	Mout le tenoient tout a sage.
	Ele n'estoit pas desdegneuse,
1070	Ne despisans, ne orgelleuse.
	Ses cuers estoit frans et gentis
	Et a honor faire ententis.
	Mout l'amoient li chevalier,
	Li bourgois et li escuier;
1075	Deseure tous l'amoit li pere.
	Dont s'apensa li fel, li lere,
	Que la damoisele prendroit,
	Au saint home le porteroit.
	Se il par fame n'est vaincus,
1080	Ja n'iert conquis ne abatus.
	Amours de feme et li soulas
	C'est voir li plus dechevans las.
	Par fame fu pris Salemons
	Et li rois David et Sansons;
1085	Par fame fu dechus Adans.
	Mout par estoit fel li Sathans
	Et engigneus en son corage.
	Un jor a levé un orage,
	Un tempés et un tourbellon;
1090	Froisse et brise tout environ,
	Et les arbres et les soliers,
	Les hautes tours et les clokiers.
	A tel noise, a tel batestal,
	S'en vint a le sale roial.
1095	Mout par demaine grant tempeste.
	Desi a le cambre n'areste
	Ou la pucele estoit enclose,
	Qui par estoit si gentis cose.
	Tout debrise et met a lagan;
1100	De la cambre abati un pan.
	La pucele quida morir,
	Ne set ou ele puist garir.
	A Dieu prie mout doucement
	Que il le get de cest torment.
1105	Son chief acouvri de ses dras.
	Le fel le prist entre ses bras,
	Si s'en tourne, bruiant l'en porte:
	Ne li fait mal ains le deporte.
	Ainc n'aresta dusqu'a le cele.
1110	La a mise la damoisele,
	Qui mout estoit espoentee.
	N'iert mervelle s'ert effreee,
	Ne se ses corages ert vains:
	Escapee iert de males mains.
1115	Jehans estoit a ourisons
	En sa capele, a genoullons.
	Barbus estoit et enermis.
	"Lieve tost sus!" dist l'enemis,
	"Cil t'aime mout et loe et prise
1120	Qui tel compaigne t'a tramise.
	Deus a oïe ta priere."
	Jehans se regarda arriere,
	Qui mout estoit en grant effroi,
	S'a veüe le fille au roi.
1125	Vestue estoit comme roiaus
	De riches dras enperiaus.
	La fache avoit blance et vermelle.
	Quant il le voit, mout s'esmervelle
	Comment la vint si faite dame.
1130	Quant la pucele a veu l'ome,
	Ele court a lui si l'enbrache.
	Or ne set Jehans que il fache,
	Car cele de douchor l'enoint,
	Qui par paour a lui se joint;
1135	N'i entendoit autre folie.
	Et Jehans auques s'amolie.
	Li anemis les aguillone,
	Il point l'un et l'autre tangoune,
	Si les a ans deus escaufés
1140	Que Jehans fist ses volentés.
	Bien l'a deables trebuchié.
	Quant Jehans ot fait son pechié,
	I1 se drecha, en sus se trait,
	Si s'esmervelle qu'il ot fait,
1145	Et dont si fais talens li vint.
	D'Adan no pere li souvint,
	Cui Eve fist mangier le fruit.
	"E! las, com pechiés m'a sousduit!
	Toutes les iaues de cest monde
1150	Ne me feroient pas si monde
	Com jou hui fui a l'ajournee.
	Feme," fait il. "mar te vi nee!
	Tu m'as dechut et engané.
	Tout ai perdu canc'ai pené.
1155	Grant dolor ai de ta venue."
	La damoisele s'aseüre,
	Qui a l'ome iert a compaignie.
	Li hermites l'a araisnie,
	Qui de grant dolor estoit plains:
1160	"Or ferai si com li vilains
	Cui leres fait anui et mal:
	Quant il a perdu son cheval
	Adont va il fremer l'estable.
	Par l'enortement del deable
1165	Sui keüs en cest grief martire."
	Li deables commenche a rire,
	Cui mout iert bel de son anui.
	"Jehan, onques si liés ne fui
	Comme je sui de cest soulas.
1170	Or es tu queüs en mes las;
	Ceste ouvragne n'ert pas celee.
	Seis tu cui as despucelee?
	C'est la fille au roi de Toulouse,
	C'uns haus hom presist a espouse.
1175	Tolu li ag son pucelage.
	Pour le mesfait de cest hontage
	Eres detrais ou ars en fu."
	Quant Jehans l'ot, onques ne fu
	Si dolans com de tel nouvele.
1180	I1 apela la damoisele,
	Qui la vint pour lui decevoir:
	"Damoisele, dites moi voir:
	Estes vous donques fille a roi?"
	"Oïl, biaus sire, par ma foi.
1185	Li rois de Toulouse est mes pere,
	Et s'est la roïne ma mere,
	Qui por moi est triste et dolente."
	"Mar entrastes en ceste sente"
	Dist cil cui deables aveule.
1190	"Ja ne sera seü du peule
	Que si aie fait mon plaisir."
	I1 le courut a bras saisir,
	Si com deables li enorte,
	Envers son puch courant l'en porte;
1195	De mautalent estraint les dens,
	Par ire le jeta dedens.
	Sa capele abat et essille,
	Si l'acouvri de la ramille;
	Ne veut que jamais soit trovee.
Back to previous page