Test

825	Il ne li caut quel part il voise.
	Ses amis lait et sa richoise,
	N'i prist garde dont peust vivre,
	A grant tourment sa car delivre.
	Querre li estevoit aumosnes,
830	Si en ooit maintes ramprosnes,
	Car il estoit et cras et blans.
	Souvent ert apelés truans.
	Les foles gens qui le veoient
	Son afaire pas ne savoient.
835	Paine a le jour, et plus le nuit;
	Ne voit cose qui li anuit;
	Sains Esperis le confortoit
	Qui en lui iert et sel portoit;
	En Dieu servir ert ses delis.
840	Souvent estoit povres ses lis.
	Quant venoit a l'ostel requerre
	Et por Dieu demandoit du fuerre,
	Souvent disoient li musart:
	"Mar i juastes a hasart!
845	Perdu avés vostre chemise.
	La fors remanrés a la bise.
	Bien demoustre vostre veüe
	Tost prenderiés cape keüe.
	Ja chaiens ne metrés le doit."
850	Et quant Jehans les entendoit,
	Si prie Dieu qu'il lor pardoinst,
	Et forche et poissanche li doinst
	Que il puist soufrir le tormente,
	Si que ses cuers ne se repente.
855	As cans le couvenoit logier,
	Car nus nel voloit herbergier,
	Si traioit as atres des viles,
	Ou disoit vespres et vigiles,
	Et saintes commendations,
860	Et proieres et ourisons.
	En sa premeraine parole
	Ramembroit l'ame de s'aiole,
	Por coi il est entrés en paine:
	Mout desirroit qu'ele fust saine.
865	Li nommoit il toute premiere.
	Vers Dieu en fist mainte priere
	En cui sa delivranche monte.
	A tel tourment et a tel honte
	S'est tant travelliés et penés
870	Que il ot les mons trespassés
	A grant tourment, a grant froidure,
	Car mervelleuse paine endure
	Et de la noif et de la glache.
	Molt li iert cangie la fache,
875	Car il estoit tains et palis,
	Descoulourés et ennoirchis.
	Des piés li degoute li sans,
	Que il soloit avoir mout blans;
	Crevés les a desi as os.
880	A Dieu en rent graces et los.
	Quant il ot trespassé Mongieu,
	Dieu prie que li doinst tel lieu
	Par son quemandement trouver,
	La ou il puist s'ame sauver.
885	Mout volentiers demoueroit
	En divers lieu, s'il le trouvoit,
	Ou il ja ne fust visités.
	Dieus, qui est voie et verités,
	Set bien que ses serjans goulouse.
890	Droit a deus lieues de Toulouse
	L'a assené, a un boscage
	Molt perillous et molt sauvage:
	Bien avoit deus lieues de lé.
	Tant a par mi le gaut alé
895	Qu'il fu ens trois lieues ou plus.
	Ne set mot quant s'est enbatus
	En une parfonde valee.
	De l'une part en une anglee
	Estoit uns espinois creüs,
900	Serés par tere et bien ramus.
	Li vaus estoit grans et parfons
	Et li espinois tous reons,
	Si com il fust as mains plantés.
	La s'est li prodom arestés.
905	Se par dedens entrer pooit,
	Volentiers i demouerroit.
	Tant a le horbe avironee
	Qu'il a une sente trouvee
	C'une ourse i fist molt a lonc tans:
910	La repaira plus de set ans,
	S'i nourissoit ses faonchiaus.
	Dedens estoit li lieus mout biaus,
	L'erbe i estoit et bele et gente.
	Quant Jehans a veü la sente,
915	Dieu en rent los mout a grant joie,
	Qui li a demoustré la voie.
	Lieve se main, I'espinoit segne,
	Car Deus a faire li ensegne,
	Et il meïsmes s'est segniés.
920	Et puis s'i est agenoulliés,
	En le sente bouta sa teste.
	A quatre piés, si comme beste,
	S'i (s')est enpains a grans destrois,
	Car il n'i peust aler drois.
925	Tant est alés qu'il vint au lieu
	Qui molt estoit biaus en mi lieu.
	Quant il vit si gent le prael,
	Sachiés pour voir molt li fu bel.
	Amont envers le ciel esgarde:
930	"Pieus Dieus, je commant en ta garde
	M'ame, mes membres et mon cors.
	Chi remanrai et vis et mors,
	Jamais ne m'en departirai.
	En cele grant forest querrai
935	Des pumetes et des rachines,
	Et de la glant et des faïnes;
	Assés trouverai a mangier.
	Il n'avoit cure de dangier,
	Ne queroit autres venisons,
940	N'autres pastés, n'autres saumons.
	Mout est alegie sa paine.
	Or ne li faut fors que fontaine:
	S'il avoit iaue seulement,
	Tout aroit son quemandement.
945	Tant a le praelet cherkié
	Qu'il trouva desous un rochié
	Une grant fosse, iaue i fu sourse,
	Que jadis i avoit fait l'ourse,
	Quant repairoit en cel convers.
950	Mout par estoit li lieus divers:
	Enermie iert et enkeüe.
	Quant il a la fosse veüe,
	S'a dit que il le vuidera,
	Se Dieu plaist iaue trouvera.
955	Tant fist puis, ce dist la matere,
	Que il trova iaue molt clere,
	Qui molt belement i sourgoit:
	Quant bon li iert si en bevoit,
	Grant bien li faisoit li puchos.
960	Li sains hom n'ert mie a repos,
	Ains labouroit et travelloit,
	A Dieu, a Sa Mere, rendoit
	Trestout plainement le servise,
	Quanc'on en fait a Sainte Eglise,
965	Fors que la messe seulement,
	De coi n'ot nul aprestement.
	Mais epistres et evangiles,
	Vespres, matines, et vegilles,
	Geünes, et afflictions,
970	Et saintes commendations.
	Estoit tous jours pres et delivres,
	Grant mestier li avoit ses livres.
	Molt estoit povres ses osteus,
	Car il n'avoit de tous cateus
975	Fors seul un livre et un coutel,
	S'erent molt povre si drapel;
	Depané erent et usé.
	Mais il avoit tout refusé
	Le delit qu'il ot en s'enfanche;
980	En Dieu ot toute sa fianche.
	Il a le sentier eslaisié
	A son coutel, et engrangié;
	Mieus en issoit que au premier,
	Par le forest kieut du ramier,
985	Des genés et de la feukiere.
	En un anglet leis sa litiere
	Establi une capelete,
	Au mieus qu'il pot, et bele et nete.
	La servoit Dieu et jour et nuit,
990	I1 ne queroit autre deduit.
	Mervelles pooit travellier,
	Les jours juner, les nuis vellier.
	D'erbe et de fruit iert sa viande,
	Nule autre cose ne demande.
995	Sains Esperis le soustenoit,
	Qui si grant savoir i metoit,
	Que si bien en iert soolés
	Com de set mes fust conreés.
	Plus de set ans mena tel vie. 
1000	Deables en ot grant envie
	Pour la bone vie qu'il maine.
	Par son travel et par sa paine
	Seit bien que infer reubera
	Et l'ame fors en jetera,
1005	Qui estoit a soi tormenter.
	Le saint home vaurra tempter.
	Il est venus a lui combatre,
	Forment se paine de l'abatre.
	Devant lui metoit les delis,
1010	Les bons mengiers, les soués lis,
	Et les chiers dras que il vestoit,
	Quant a l'ostel son pere estoit.
	"De tous estoies honerés,
	Or es caitis et esgarés.
Back to previous page