610 A Dieu deprient, qu'il consente
Si faire au gré de lor segnor
Que preu i aient et honour.
La proiere fu bone et bele.
Quant set ans ot la damoisele,
615 L'apostoiles, il ne pot ains,
Le mist avoec saintes nonnains
Pour aprendre l'us de l'eglise.
Les dames l'ont a letre mise.
Tant fu a letre et el moustier
620 Que seut bien lire son sautier.
Quant ele vint a l'an dousime,
Bien fu letree et bien saintisme.
Trestoutes les nonnains l'amoient
Pour la bonté qu'en li veoient:
625 Ja ne perdist eure ne messe.
Souvent disoit a l'abeesse:
Pourcoi les noirs dras ne li done,
Si seroit sa fille et sa nonne.
L'abeesse nel voloit faire,
630 Car ele savoit bien l'afaire
Del fruit qui venir en devoit;
L'apostoiles dit li avoit.
Quant el quinsisme an fu entree,
A sa mere fu ramenee,
635 Triste, dolante, et esbahie.
Mout amast mieus en l'abeïe
A estre nonne et Dieu servir.
L'apostoiles nel vaut soufrir,
Ains vieut que mariee soit,
640 Si que cele ame, qui estoit
Es grans tourmens et es dolors,
Par cel mariage ait secours,
Si com il iert prophetisié
Et li ame l'ot anonchié.
645 Mout li poise del lonc sejour.
L'apostoiles manda un jour
En sa capele son compere,
Et si fu avoec sa commere.
A eus parla secreement,
650 Si lor devisa le torment
Que il vit sa mere souffrir,
Et comment ele en doit issir.
"Par vo file, qui tant est sage.
Mout desire le mariage,
655 Car de sa nieche istra uns fieus
Qui le jetera des perieus
Et metra a redention,
Si vous commant qu'ele ait baron
Lues qu'ele ara passé vint ans.
660 Mout par li samble lons li tans
Que faite soit ceste portee
Par qu'ele soit d'infer jetee.
Tout ce faites, bele commere,
Si com amés l'ame vo mere,
665 Car mout en est grans li mestiers."
"Sire, nous ferons volentiers
Trestout vostre quemandement;
Ja n'i ara deveement."
Puis garderent tant la meschine
670 Que ele vint a droit termine,
Dont li fisent prendre segnor
A grant joie et a grant honor.
Mout i ot grant feste menee.
A Dieu plot mout cele assamblee.
675 La dame, qui estoit aprise
Et des nonnains et de l'eglise,
Vers son segnor sauvage estoit,
Mais se mere, qui mout l'amoit,
Li commande et li ensaigne
680 C'a son segnor ne soit estraigne,
Mais acointans et debonaire,
Car ce doit preudefeme faire.
Nel disoit por autre deduit,
Mais ele desiroit le fruit
685 Par coi sa mere soit sauvee
Et fors de la chartre jetee,
Ou ele gist en grans tristours.
Mais bien set qu'ele aura secours
Dedens quarante ans certement;
690 Cascun jor en rit en tourment.
La dame, qui est bone et sainte,
Ains le demi an fu enchainte
Del fil dont vous cont la matere.
Quant le sot li pere et la mere,
695 Mervelleuse joie en demainent,
De li servir forment se painent
Et de faire tout son plaisir,
Tant que ce vint a l'ajesir.
Quant fu nés li bons eürés,
700 Qui tant ot esté desirrés,
Au bautisier ot non Jehans.
Mout soufri paines et ahans
Pour aquerre la sainte gloire,
Si com vous orrés en l'estoire,
705 Qui mout est saintisme et oneste.
L'enfant norrirent a grant feste,
Que Damedieus avoit tramis.
A set ans fu a letre mis,
Mout devint sages et soutis,
710 Et d'aprendre si ententis,
Ja son voel d'escole n'issist.
Tant estudia et aprist
Que il ot catorse ans passés.
Trestous les clers ot seurmontés
715 Qui estoient de son aage.
Dedens Rome n'avoit si sage,
De tous les ars parés estoit.
Sa taie, qui mout chier l'avoit,
Ert mout lie de ceste cose,
720 Que toute clergie l'alose.
De sa mere ert en ramembrance,
En chou avoit mout grant fiance,
Qu'il ne se vaut de riens mesfaire.
Tant par est frans et debonaire
725 Que tout l'aiment, et povre et riche. 725
Et tant amoit le Dieu service,
Cascun jour aloit au mostier,
S'aidoit a faire le mestier;
A Dieu servir ot mis s'amors.
730 Quant le vit de si bones mours,
Si s'apensa que li diroit
Que li sains hom dit li avoit,
Qui iert alés piech'a a fin.
Un jour apela le meschin,
735 Qui ja estoit maistres d'escole.
En plourant le baise et acole,
Les larmes li kieent des eus.
"Dame," fait il. "dont vient chis dieus ?
Dites moi, porcoi vous plourés."
740 "Biaus niés, a par main le sarés."
Fors d'une boiste trait l'escrit
Que Sains Basiles ot escrit,
Douné li a et si souspire.
Et Jehans commencha a lire
745 Les grans tourmens des divers fus
Que li sains hom avoit veüs,
Que par son escrit li ensegne.
Peour en a et si se segne.
Tant crut et monta la parole
750 Qu'il vit les tourmens de s'aiole,
Et comment ele rist por lui.
Jeter le vaut de cest anui.
A molt lonc tans [i] gent a ente ( ?)
En lui avoit mise s'entente,
755 De cel lieu couvient qu'il le traie.
"Dites moi," fait il. "bele taie,
Qui vous donna ceste escriture?"
Toute li conte l'aventure,
Si com Basiles, li senés,
760 Li avoit les escris donés,
"Si commanda que jes gardaisse,
Quant grans fuissiés, jes vous donaisse.
Doné les vous ai, biaus dous frere,
Or pensés de l'ame ma mere,
765 Qu'ele soit hors de penitanche."
"Deus li Sires m'en doinst poissanche!"
Fait li bons clers, a chiere morne.
L'escrit en porte, si s'en torne;
A l'escole s'en est alés.
770 Ses cuers estoit mout esfreés,
De chou c'ot veü s'esmervelle;
A lui meisme se conselle,
Comment il porra esploitier.
N'estera pas un mois entier,
775 Ains laira son pere et sa mere
Et la grant rikece ou il ere.
Rikece fait l'ome orgellous,
Et despisant et desdaigneus.
Trop ies entré[s] en felonie
780 Quant cele ame iert desvoie
Fors de la chartre tenebrouse,
Ou es tourmens gist angoissose.
Trop fust cargie del meneur.
Trop a[i] esté a grant honor,
785 Tout m'apelent segnor et mestre,
Mais par Celui qui me fist nestre
J'escaperai de cest peril,
Et si m'en fuirai en essil,
Ou en desert ou en boscage.
790 Mandé me fu par tel message
Comme du plus tres saintisme home
Qui puis Saint Pierre fust a Rome.
Or me consaut et ait Deus!
Mais ains donrai tous mes cateus
795 As povres, et livres et dras,
Ne m'en irai mie si cras,
Mais atournés com hom estranges,
Sans cauchemente, tous en langes.
Qui a Dieu se vieut aprochier,
800 Sa char li couvient justichier,
Et qui revele sa carongne,
Par gloutenie sten eslongne.
Jou n'ai pas fait mout grant savoir,
Que tout li ai fait son voloir
805 D'un autre gieu li juerai,
Jamais son voloir ne ferai,
Autre chemin ai ja visé."
Tout fist quanqu'il a devisé,
N'i remest nule creature,
810 S'acata povre vesteure;
Ses crins copa li gentius clers,
Qui en Dieu servir estoit fers.
Molt a encarchié grieve somme.
Une nuit est issus de Rome
815 Devers les mons, par une porte.
Un livre seulement en porte
Pour servir Dieu et Nostre Dame.
Il commanda son cors et s'ame
En cele garde ou li Sauverre
820 Commanda en la crois se mere.
Plourant s'en va mout tenrement.
Puis Saint Alexiu, voirement,
Dont on nous raconte les fais,
N'encarca nus clers si grant fais.
Back to previous page
Next Page