Test

410	Laiens gisent li mescreant,
	Qui lor baptesme vergognoient,
	Et le saint cors Dieu despisoient,
	Si despisoient sacremens
	Et nueches et espousemens;
415	Laiens maint cele gent despite,
	Avoec eus sont li sodomite,
	Qui ouvrerent contre nature.
	Toute la puours et l'ordure,
	Qui par tous les infers converse,
420	Et nuit et jour sor eus reverse;
	Che sont cil flueve qui resounent,
	Qui tel bruit et tel noise donent;
	Tous jours lor versent sour les caus:
	As dolans est tes loiers saus.
425	Cele fosse que vois reonde
	Est plus de mil toises parfonde.
	Chou est li abismes parfons
	Ou il n'a ne rive ne fons;
	Cil laiens n'aront ja secours.
430	Se te moustroie les dolours,
	Je sai bien que je mesferoie;
	A paines t'en retourneroie:
	Tant est lor paine laide et fiere."
	Li angles retorna arriere,
435	L'ame en mena fors des muriaus
	A un tertre qui mout fu haus.
	Main a main le tertre monterent.
	Quant lasus vinrent, si trouverent
	Alumé un mout cruel fu.
440	Li arme d'une fame i fu,
	Escavelee, toute nue;
	Mout iert li lasse mal venue.
	Set deable entour li estoient,
	Qui set tourmens li aprestoient.
445	Li uns iert a l'autre divers.
	A li seule estoit cil infers.
	Li tirant qui le tourmentoient
	En la famine le getoient.
	Tant par estoit grans la famine,
450	Se tous li blés et la ferine
	Qui est eu mont fust mise en pain,
	Ne soolast mie son fain.
	Quant cil l'orent si tourmentee,
	Ens en la soif l'ont puis jetee,
455	Qui mout estoit et aspre et fiere.
	Se la mers iert toute riviere
	Et par mi le cors li passast,
	Son soif ja n'en asouagast.
	D'iluec le getent li tirant
460	En une caudiere boulant.
	N'estoit pas iaue, ains estoit plons.
	L'ame s'en va dusques au fons,
	Et quant li chiés deseur revint,
	Grant dolor soufrir li couvint.
465	Tant ont la lasse demenee
	Qu'il l'ont en set tormens boutee;
	Adont le rejetent el fu.
	Et quant en mi la flambe fu,
	Si prist a rire et a jouer,
470	Et si grant joie a demener,
	Com se fust a feste ou a voille.
	L' ame parla de l'apostoile,
	S'apela l'angle Saint Mikiel:
	"Sire, pour Dieu qui maint el ciel,
475	Dont vient que cele ame puet rire?"
	"Ichou te sai jou bien a dire."
	As tirans dist: "Tout coi estés,
	Gardés que l'ame n'adesés.
	Aportés le chi erroment."
480	Cil fisent son quemandement,
	Qui vers lui n'orent nul pooir.
	A l'ame dist: "Je voel savoir
	Pourcoi tu es ensi detorte."
	"Sire," fait ele, "orgués m'a morte.
485	Jou fui au mont si orguilleuse,
	Si despitans, si dangereuse,
	Quant les povres venir veoie,
	En despit mon nés estoupoie;
	Home ne fame n'adegnai,
490	De tous mes dis de tous gabai.
	Mar le fis lasse, c'est mes deus;
	Trop par est lais pechiés orgeus.
	Par orguel caï Lucifer
	Des haus chieus lassus en infer;
495	Com plus fu biaus plus est hideus.
	Engingnié sont li orgelleus;
	Grans maus lor covenra soufrir."
	Fait li angles: "Jou voel oir
	Dont li ris vient et que ce monte.
500	A ceste ame le voir en conte."
	"Sire, mout li seroit bien dit,
	Se tant avoie de respit."
	''Oïl, assés aras loisir."
	"Et jou ferai vostre plaisir.
505	Quant vous plaist, faire le couvient.
	Or vous dirai de coi il vient.
	J'ai une fille mariee,
	Que uns preudons l'a espousee,
	Qui est de son segnor enchainte
510	D'une fille qui ert mout sainte.
	Cele fille un fil portera,
	Qui de chaiens me jetera,
	Jehans Paulus ert apelés:
	Par lui iert mes tormens finés.
515	Tel joie en ai, quant moi en membre,
	Tout m'en assouagent li membre.
	De chou vient li ris, biaus dous sire."
	Fait li angles: "Il t'estuet dire
	Ou ele maint, et si le nomme.
520	"Biaus sire, en le cité de Rome."
	Tout li despont et fait savoir,
	Que l'ame sot bien le manoir,
	Et de ques gens iert ses barons,
	Si en retint ans deus les nons.
525	Tant ot le lasse de repos
	Que ele lour conta ches mos.
	Lues qu'il s'en partent, erroment
	L'en couvient raler en tourment:
	Mout l'en poise quant vont en sus.
530	Li angles est d'infer issus,
	Au saint cors vint, I'ame i reboute,
	La ou il gisoit en la croute,
	Tous estendus si comme mors.
	Lues que li ame fu eu cors,
535	Il se leva sus a droiture.
	Ramembra li de l'aventure
	Et des grans tormens que il vit,
	Si les fist tous metre en escrit,
	Quant il vint en l'ostel de vie.
540	Ensi le trouve on en sa vie.
	Quant li angles s'en fu ralés,
	Li apostoiles est remés.
	Preudom avoit esté adés,
	Or fu encor mieudres aprés;
545	Des grans tourmens li souvenoit,
	Que l'angles moustré li avoit;
	Ramembre lui de le lasse ame,
	Et del preudome, et de sa fame,
	Qui es tourmens art et flaele.
550	Deus sergans devant lui apele.
	De la rue lour dist le non,
	Et de la feme et du baron;
	Tost quemanda aler por eus,
	Et ses amainent ambes deus.
555	Li sergant querre les alerent,
	A lor segnor les amenerent,
	Bien atournés et richement,
	Car mout ierent de haute gent.
	Quant il vit la dame enpraignie,
560	Lieve sa main si l'a segnie;
	Lor nons lor requiert tout premiers.
	Il li conterent volentiers.
	Et l'apostoiles lor conta,
	Onques nul mot n'i oublia,
	Quanque l'arme es tormens lor dist:
	Ains de riens nule n'i mesprist.
565	"Dame," fait il. "avés vous mere?"
	"Naie," fait ele, "sire pere,
	Ele est morte bien a vint ans.
	J'estoie de si jone tans
	C'o les enfans jouer aloie,
570	Quant en biere iert, si peu savoie.
	Damedeus ait merchi de s'ame!"
	L'apostoiles dist a la dame.
	Et aprés si redist au pere:
	"De cel enfant serai compere;
575	Deus doinst c'a joie le voiés!
	Tout maintenant le m'envoiés
	Que Deus l'ara mis a naissanche,
	Je vous commant par penitanche.
	Jou bautiserai la pucele."
580	"Comment dont, sire, ert dont femele ?"
	"0ïl, je le vous di pour voir."
	Dont ralerent a lor manoir.
	De lor segnor sont mout joiant,
	Qui lor a demandé l'enfant,
585	Ains que d'agesir fust li drois.
	I fu li sains hom mainte fois,
	Sa commere beneïssoit
	Et bonement le confortoit.
	Quant de l'ajesir vint li eure,
590	Ses maus li prist, qui ne demeure.
	La Mere Dieu durment apele.
	Et quant nee fu la pucele,
	Mout richement l'aparellierent,
	A l'apostoile l'envoierent.
595	Lues que la dame fu ajute,
	A mout grant joie l'a rechute.
	Il le bautise de ses mains.
	De celi nasqui li bons sains,
	Qui mout ouvra en son vivant,
600	Si com orrés cha en avant.
	Quant li sains hom l'ot baptisie,
	A grant joie l'a renvoie.
	I1 mande salus sa commere,
	Si commande li et le pere
605	Que de l'enfant prengnent grant cure,
	Si fisent il. com fu droiture.
	Li bourgois, qui mout estoit riches,
	Livra l'enfant a deus nourriches,
	Qui mout i misent grant entente.
Back to previous page