Li angles qui l'ame gari
210 L'a ramenee a un peril
Ki ert sor un flueve boulant:
Comme tempeste aloit boulant.
Ne vous sai dire la longeche,
Ains parlerai de la destreche.
215 Laiens se baignoient set ames,
Qui trestoutes estoient fames.
E1 flueve sieent dusc'as rains,
S'avoient loiies les mains
De grans serpens, nient de cordeles,
220 Qui lor mengoient lor mameles.
En cel peril par les caus sont.
Cent enemi devant lour vont,
Ki de grans tisons les gueroient,
Par les visages les ardoient.
225 Par desous boulent a grant rage,
Deseur lor ardent li visage;
Trop avoient honte et dolor.
Li ame en ot mout grant paour,
A l'angle dist: "Faites moi certe
230 De coi fu faite la deserte
Dont les lasses ont tel tourment."
"Ice te dirai je briement:
Ce furent au mont damoiseles
Qui se tenoient a puceles,
235 Et veves dames ensement,
Qui durent vivre castement,
Et fausses nounains mescreues,
Qui estoient a Dieu rendues,
Si amerent par folenté
240 Et faisoient lour volenté.
Quant eles erent enpraignies
Et se sentoient engignies,
Si se tenoient por la gent
En lor lis par escampement.
245 Tantost que li enfant naissoient,
Isnelement les estrangloient,
Si lour toloient le bautesme,
Le presignement et le cresme.
Pour les ames c'ont Dieu tolues
250 Sont a si fait tourment venues.
Autre si fait loier atendent
Toutes celes qui si se rendent:
Chis tourmens lour est aprestés.
Dont est l'angles avant alés.
255 L'ame mena a un caut four,
Qui iert a destre en un destour.
Laiens se baignent mal esré.
Or vous deviserai le ré:
Li rés estoit fais par trois lis
260 D'oumes qui pour les faus delis
Furent si recuit en la vie
Qu'il gisoient el fu d'envie.
El premier lit avoit evesques,
Faus cardounaus, faus archevesques,
265 De cha abbés, de cha faus moines,
De faus prelas, de faus canoines,
Que esgarde ore tous li pules.
Couvoitise les fist avules.
Tant pourcachierent li faus mestre
270 Qu'il perdirent vie celestre
Et le compaignie des sains.
De c'est fais li lis premerains.
En l'autre lit avoit faus contes,
Faus dus, faus rois et faus viscontes,
275 Faus chevaliers, faus castelains,
Qui justichierent les vilains,
Qui trestous les biens lor faisoient.
Et li chevalier lor toloient,
Pour avoir armes et chevaus.
280 De ces dolans et de ces faus
Iert li moiens lis arrengiés.
Ensi les en a Deus vengiés.
Li tiers lis, qui desus gisoit,
De faus laboreours estoit,
285 Qui a mal misent lor ententes,
Qui emblerent dismes et rentes;
Si estoit de faus marcheans,
Qui convoiteus furent tous tans,
Onques loiauté me menerent
290 Ne compaignons foi ne porterent.
Ainc ne vaurrent feste garder.
Or leur estuet chier comparer:
Hounis est qui les sains n'onneure.
De c'est li tiers lis par deseure.
295 Qui plus ot au mont grant pooir
Plus a grant honte en cest manoir.
Trestout entour ceste fornaise,
Et si estoient a malaise,
Ot cent enemis qui souffloient
300 Et cele fournaise embrasoient,
Si que li fus, qui tant ert fors,
Par mi les trois lis saloit fors.
La oïssiés faire a destrains
Dolerous cris, dolerous plains,
305 A larmes, a gemissemens.
L'ame regarde les tourmens,
S'enquist pourcoi il ont tel honte.
Et li angles tout li raconte
Pourcoi cascuns suefre la paine;
310 Bien l'en a fait sage et certaine.
D'iluec se departent a oirre,
Si oïrent un grant tonoirre,
Et foudres caïr et tempés.
Del tourment ierent assés prés.
315 Tant ont alé par mi l'oscur
Qu'il sont venu a un grant mur;
N'iert pas de cauc ne de mortier,
Ains estoit de fer et d'achier.
Si estinchele de tous lés
320 Comme tisons qui'st embrasés.
Dedens avoit grant fereïs,
Et un si fier bateleïs
Que l'ame en est toute estourdie.
A l'angle proie que li die
325 Qu'est en cel mur, ki tant est fiers,
Dont li esclistres ist si fiers.
"Ce sont mescreant et erite
Et desloial et sodomite,
Qui alerent contre droiture.
330 N'ont mie tant bone aventure
Qu'il soient entre autre gent;
A par aus suefrent leur torment.
Laiens m'estuet que je te maine,
Si esgarderas lor grant paine.
335 Por ce te moustre Nostre Sire,
Que tu le saches au mont dire.
Plus de quatre chens piés avant
Alerent le mur costoiant
Ains qu'il entrassent en la porte.
340 Nus n'i joue ne n'i deporte,
Ains i a grans cris et dolours,
Souspiremens, plaintes et plours,
Et noise si trés mervelleuse
Que l'ame en est mout paoureuse.
345 Encoste le mur en eslaises
Avoit plus de trois mil fornaises,
U li fus iert crueus et maus.
Ouvriers i avoit a grans maus,
Ki pieches de metal tenoient,
350 De deniers faire s'aprestoient:
Mout par faisoient laides frumes.
Savés dont ierent lor englumes?
Desor les testes d'useriers,
La batoient il lor deniers,
355 Et sor lor cors et sor lor vis.
Encor lor faisoient il pis,
Que quant lor deniers refusoient,
Dedens lor goules les boutoient,
A force lor font engloutir
360 Et par les boutines rissir.
Chis tourmens iert trop quemunaus,
Dont il emploient lor fambaus.
Tant metent sor lor hateriaus
Et de bourses et de gourliaus
365 C'a paines pooient aler,
A force lor couvient porter.
Derriere les boutent et batent,
Es crueus tourmens les embatent,
Dont tant i a que ne sai dire.
370 Trop avoient honte et martire:
Souvent versent, souvent trebuchent,
Et li dolant crïent et huchent:
"E! las, caitif, mar userames,
Quant si fait ostel acatames,
375 Ou tous jours a soif et famines,
Tempés, orages, et bruines.
Dolant, mar avons esploitié!"
L'arme dist, qui en ot pitié:
"Queus gens furent, pour Saint Sepucre ?"
380 "Ce furent userier et lucre,
Qui les grans avoirs amasserent,
Et lor voisins desireterent.
Ains n'orent tel plenté d'avoir
Que plus n'en vausissent avoir.
385 Tous jours amasserent argent,
Et tous jours croissent leur torment.
Autel atendent cil qui vivent,
Qui a si fait mestier estrivent;
Ja n'iert jours tourmens ne lor croisse.
390 D'autre part tourment on lespoise ( ?)
Tant ont alé par le closture,
Qui mout estoit laide et oscure,
Qu'il sont venu a une goufre.
Dedens ardoit uns fus a soufre.
395 Toute la couture puoit
De la fumiere qui issoit.
Dedens caoient trois rivieres,
Qui mout ierent crueus et fieres.
Chis tormens n'avoit onques cesse.
400 Au caïr menoit tel tempeste
Que de paour l'ame esbahirent:
C'est li tounoires qu'il oïrent.
Li arme mout s'en esmervelle,
De paour est toute vermelle,
405 Et l'angles vient, vers li s'adosse:
"Sire, qu'est chou en cele fosse,
Ou tel noise a c'on n'i voit goute ?"
"Bien le saras, ne t'en redoute,
Del tout ferai a ton creant.
Back to previous page
Next Page